ينابيع نوي / نجم الشعر
ياطايرة الرس هومي بالاقلاع
وخلي تجاهك شرق بغلاف جوي
ترى عيوني لك جناحين وشراع
فوق بريده ياطايرة ميق دوي
لو البلاد فجوجها كثارٍ وساع
أبيك بارضي تهبطين بتروي
فوقك حبيبي تلني بين الاضلاع
يارد ويشرب من ينابيع نوي
الصاحب اللي مالنا غيره اطماع
قلبي معه بالطامنه والعلوي
عليك قلبي ياهوى البال منلاع
ملكتني بالحب احكم وسوي
يابو خدودٍ كنها البرق لماع
نورك يغطي بالبلد كل ضوي
عزالله اني فيك يازين طماع
مادام جوك ياهوى البال جوي
أنا معك يازين في كل الاوضاع
تامرني وتنهاني ماقول توي
لبيك يالمجمول يازين الاطباع
وكل الذي تبيه مني اسوي
وانا تكفيني ضمةٍ بين الاكواع
تشفي*غليل*القلب وتسعد سموي
نجم الشعر/ نايف بن عبدالله الشويب
|
العضو المميز 
العرض العادي
